الخميس، 29 أغسطس، 2013

الحب خرم الأبلكاش

مساء الخير..

طفل صغيّر كانت جُلّ إهتماماته هو توسيع دائرة الثقب المصنوع في اللوح الأبلاكاش الغلبان اللي كان العازل الوحيد بينه و بين رؤية (زينب الترمساني) زميلته من مدرسة البنات المواجهة لشباك فصله مع رفقته من قرود البابون المتوحشة اللي مصرّين لسبب ما غريب على تسميتهم بالـطلاب.
لما كبر , و بعد سنين غربة و عذاب و أشواق بينه وبين (زينب) و جوابات تحوي من الأخطاء الإملائية فيها أكثر من صحيح الحروف , سابته و إتجوزت (أبو متعب) المتريّش و سافرت معاه  الكويت لإنها بيهما الراجل و آخر إهتماماتها الفلوس و الماديات, بعد ما وعدته قبلها بيومين إنها مش هتسيبه أبدا مهما حصل.

الثلاثاء، 27 أغسطس، 2013

يسقط حكم الفيس بوك

صباح الخير..

يتيح لك الحظر 12 ساعة من التفكر في ملكوت الله, و إستكشاف ما هي المتعة وراء تفضيل الناس لأَكل المسقّعة و هي سخنة, و التراص الكمي للكواترات داخل الشفة السفلى للببلاوي, حيث يرجع بيك الزمن لأيام الحضانة العكرة - إلهي مايعيدها يارب - حيث كانت حياتك سعيدة و مليئة بأحداث ملحمية زي ماتش الكورة بينك و بين ولاد حارة "عتّاب" اللي جنبكم, و لعب بطولة البلي المحلّية ,فلم يكن فيها الحيوان (مارك زكربرج).. قبل أن تصبأ عن ملة أبائك و تنتهج الجلوس على هذا الإختراع الأزرق اللعين,(الفيس بوك).

السبت، 24 أغسطس، 2013

الثلاثاء، 20 أغسطس، 2013

ليلة القبض على بديع

صباح الخير..رغم إن الظلام سادل ستاره على البلاد..لكن عشان مستر (مصطفى) علّمنا كده في المدرسة فلازم مانخرجش عن طوعه و إرادته..إحنا شعب يمشي بالقراطة و بيتشرب البيروقراطية من صغره.

الاثنين، 19 أغسطس، 2013

أنا و الهضبة و الليلة

- عدت الأيام عليّا: يبدو إن تأثير حمادة هلال شعشع و تبشع في كل المغنيين حتى الهضبة..الأغنية ماشي حالها , التكرار قاتل.

- الليلة: ماستر الشريط, أغنية من 3 سطور مكررة لسبب ما غريب توقعت أفضل من كده ...من ساعة مادخلت النفق المظلم بتاع روتانا ده يا هضبة و إنت في النازل..بس تنفع كأغنية في فرح.

- عندي سؤال: نظام الأغنية جديد ع الهضبة بس يبدو إن الصدفة وقفت في صفة المرة دي . موضوع الأغنية و عرضها كان موفق.

الجمعة، 16 أغسطس، 2013

إيجز فاكتور - صانع التعاسة

عزيزي المواطن الشريف..

أنا هافترض إنك شريف أنا ما أعرفش إذا كنت بتتاجر في المخدرات أو في أعضاء الأطفال ولا حاجة فهأعتبرك شريف.

لك أن تتخيل برنامج (إكس فاكتور). و الساعة الإسبوعية اللي بيزعجنا فيها بشوية المخنفين المسنكحين اللي فاكرين نفسهم بيغنوا و بيصبوا علينا من إنعدام مواهبهم الجم, أنا مش بأسلبهم حريتهم ولا حاجة أنا فقط أبدي رأيي الخاص, و طبعا مع الإعلانات يمتط البرنامج لـ3 ساعات مملة من الفقع المتواصل و إنت قاعد كما الحنكليس في كنبتك أو منجعص زي القنفذ في سريرك تتابع أحد الخنافيس و هو بيحاول يشق طريقه لمشواره الغنائي اللي هينتهي بعد تاني شريط بفيديو كليب هابط فيه 56734 بنت بتترقص لسبب ما مش مفهوم!.

الخميس، 15 أغسطس، 2013

أتعاطف أو لا أتعاطف..هذا هو السؤال!

نفسي أتعاطف معاك بس لما تشيل سلاح و تحرق أقسام وكنايس و تدبح ضباط بتصعّب المهمة عليّا..

عشان كده هأسكت لأني رغم إقتناعي الواقعي أن فض إعتصام زي ده كان ضروري ,و أكيد ليه ضحايا لكن العدد كبير و مش هأصدقك و أعتبر إن طرف واحد هو المتسبب فيهم ..إنت كمان شاركت عشان خاطر رئيس مايستاهلش و جماعة باعتك بالرخيص

أرجوك لو نازل تناصره أو تناصر الإسلام فإنت مضحوك عليك

دمك أغلى من كل ده..

بعد كده ماتطلبش تعاطفي و ماتزايدش على إنسانيتي

حكومة مش قادرة تحمي شعبها و جماعة ماتعرفش تعيش من غير دم

نقطة من أول السطر..

الأربعاء، 14 أغسطس، 2013

من الأفضل أن تؤمن و تكون غلطان بدلا من أن لا تؤمن و تكون غلطان

من الجُمَل اللي بتواجه اللادينيين كتير كحجة أو منطق يبدو للوَهلة الأولى سليم, هو الجملة دي
"من الأفضل أن تؤمن و تكون غلطان بدلا من أن لا تؤمن و تكون غلطان"

بمعنى إنك لو آمنت و ماطلعش في حاجة يبقى انت مش خسران, لكن لو ما آمنتش و طلع في حاجة فالعاقبة - حسب إيمانهم - وخيمة..و هنا هيتبادر لذهن المدقق في العبارة عدة أسئلة:
- أنهي إيمان هو الصح؟
- طب ومش كده تلاعب بالإيمان, يعني مش إيمان حقيقي؟
- و هل ده يكفي الإله عدلا ان يكون الايمان بوجوده دون دليل هو عامل النعيم و العذاب؟

السبت، 10 أغسطس، 2013

القضاء ,بين الرغبة و الواقع

في جزئية متشعبة شوية بتاعة تطهير القضاء, و مفهومها لدي الشعب..
هل معنى تطهير القضاء إنك "عايز قضاء يحكم بالعدل؟" ولا "قضاء يحكم برغبتك؟"
القضاء اللي بيحكم بالعدل يا سيدي الفاضل بيؤمن بمبدأ أن المتهم بريء حتى تثبت إدانته, و عشان تثبت إدانته لازم إجراءات و أدلة و تمحيص و ضحد..مش أي حد بالسلام !.
و ده هيحكم بما لديه حتى لو أنا و إنت و كل الناس متأكده ان فلان الفلاني ابن ستين في سبعين, بس مش عارفين نثبت..و العدل لا يأخذ بالظنون.

الجمعة، 9 أغسطس، 2013

الشعب الذي فقد ظله

بيتميز كل شعب بخاصية معينة, رغم إنه ممكن يكون فيه العِبر بس الخاصية دي بتخليه يدخل جوّة دوارية معينة من التميّز..لما بيفقدها بيتحول لمسخ شبه نسخة ملوثة ممن حوله

الميزة دي عند المصريين "كانت" الجدعنة..
و إسمح لي أقول لك كانت, لإن في اللغة المعاصرة كلمة كانت هي اللي بتعبر عن الشيء اللي كان موجود و فقد..سواء تم إفقاده أو تلاشى ذاتيا , إختفى مرة واحدة ولا إنتهى بالتدريج..

الخميس، 8 أغسطس، 2013

بوست العيد...

بعد قليل ستتوافد جموع كبيرة من الثدييات الرئيسية نحو جبال من الكحك و البسكوت في تناغم سعيد على أنغام "ياليلة العيد أنيييستيييييييييناااا" ,و كلهم مرح و محبة يحلمون بقضاء بعض الساعات من المرح عشان يتناسوا مديرهم (أشرف الجارحي) اللي إداهم يومين أجازة عيد بدال 3 ,و خالتك سنية اللي هتجوز بنتها و زعلانة منك عشان ماحضرتش كتب الكتاب, إلهي يكتبوا شهادة وفاتك يا بعيدة.

الثلاثاء، 6 أغسطس، 2013

عزيزي المتحرش

عزيزي المتحرش و اللي مش متحرش بس بتحترمهم..
نود أن نوصل لعلمك و نبلغ سيادتك و أنت جالس في أنتختك المستفيضة تربي كرشك اللي هو تقنيا الشيء الوحيد الذي تم تربيته فيك, ان العيد على الأبواب,و يشتهر العيد في مصر بأنه موسم تكاثر الكائنات المتحرشة مما يجعلها في حالة هياج مستمر و إستنفار عام للتعبئة و غزو الحدائق العامة للخلاص على الأخضر و اليابس من فتيات و بنات و عواجيز و جثث و مش بعيد يتحرشوا بصاحب البوست شخصيا..
في ظل الصمت العام و الوجوم السلبي لوسائل الإعلام التي تمارس دور الحجة مستكة بتاعة حارتكم في الولولة و النواح - كالعادة - كل سنة.

السبت، 3 أغسطس، 2013

س ل م

"سوابق لا مقبولة"

مش هتقدر تتقبل تحوّل تلك الأشياء المستكينة في كينونات الآخرين إلى واقع طالما أن هذا الواقع لا يتضمنك..لا يشفع لها كونها أوّل مرة..
أنت عايز تكون دايما في كل ما هو جديد و إلا تحوّل إلى سوابق لا مقبولة..


فلسفة الفراغ

هل تعلم أن 99.9% من حجم الذرة فراغ!
و ده معناه إن كل شيء تقنيا تقريبا ولا شيء..
كل ماتعرفه و ما ستعرفه يوما هو شبه فارغ.. على المنحى الفيزيائي و المعنوي و الفلسفي..
حتى انت, لولا تلك الصدفة الحميدة اللي خلّت أجهزة الإستقبال و الإستشعار العصبية لعينيك تتفاعل مع الضوء المنعكس من على جسدك , لكنك غير مُلاحَظ.
إنت مجرد شذرات ملحوظة من الفراغ..