السبت، 31 ديسمبر، 2016

أول يوم تجنيد

*تنويه المحتوى لم يكتب بواسطة محمد البرقي*


نغمه المنبه، انها الثامنة صباحًا، شعرت بالرغبه في العوده للنوم فكنت اعيش في ذلك الحلم الجميل بمغادرة البلاد والعمل يسيطر علي حياتي اليومية، ولكن اليوم "مش عادي"، فإني ذاهب إلي مكتب التجنيد في قسم الهرم.
لقد تأخرت عن مواعيد العمل الرسمية، جمعت اغراضي وفي طريقي لباب الغرفة تذكرت ذلك الحادث الذي وقع قبل يومي هذا بأسبوع، وأخرجت مفاتيح السيارة من جيبي ووضعتها علي المكتب، فكنت معتاد علي قيادتها يوميًا حتي وقع أخي بحادث مروري، وأدركت أن اسوء أيامي علي وشك أن تبدأ.
غادرت بيتي مسرعًا لإركب "العربية البوكس" او "عربية الفيومية" كما يسميها البعض، الجو حار والشمس تغطي كل مكان، أين انا؟ إلي أين ذاهب؟ كالعاده بدأت الأصوات داخلي تسيطر علي الجزء الأكبر من تفكيري، "سنك أصغر من كل اللي داخلين الجيش بسنه"، "معاد تقديمك عدي اساسًا كمان وانت مقدم متأخر في دفعة غير دفعتك"، "هتاخد شهر ونص زياده علي جيشك"، "هو أخرو هنا صح؟"، لا هذا السؤال من العالم الخارجي، فآتي من طفل يجلس أمامي ويبدو عليه القلق، نظرت حولي فلم يوجد احد غيري بالعربة مع ذلك الطفل، واجبت بهزه رأس مشيرًا نعم، ومن ثم اتجهت إلي "موقف الميكروباصات".
"رماية ده يسطي؟" وكانت أول جمله انطقها منذ مغادرتي الفراش، "ايوه يا اخويا" قالها السائق وهو ينظر إلي مؤخرة فتاة تركب عربة بجانبه، شعرت "بعلامة استفهام" كبيره ظهرت فوق رأسي عقب النظر داخل العربة، وفي النهاية اخترت الجلوس بجانب "شبح" عن الجلوس جانب تلك الفتاة ذات البشرة السوداء التي بدا عليها الانزعاج ورمقتني بنظرات غريبة.
صوتًا قريبًا جدًا من أذني "متعرفش الأجره كام يا نجم؟"، نعم إنه ذلك الشاب "الشبح"، وبنظره احتقار قلت "3 جنية"، لحظتها شعرت بأن هناك شيئًا خاطئ، نعم إنه أسوء يومٍ علي الإطلاق "نسيت الهيدفون"، كيف لي أن انسي منقذتي من هذا العالم؟!
إنها الاصوات مجددًا، "ازاي نسيت الهيدفون؟"، "هتقضي يوم زي الخره"، "حرام عليك"، وبعد جدال مرير، انتقلت الاصوات للحديث عن أمراضي، وهل ستكون سببًا كافيًا لعدم ادائي الخدمة العسكرية؟، وعلمت من بعض الأصدقاء مسبقًا أن مرضي الربو لا يؤدون الخدمة العسكرية، في حين البعض الأخر من بينهم أخي ينكر ذلك.
ماذا عن انفي؟ ستة عمليات جراحية كافية لإخراجي من هذا العبث، أسبابي كافية علي ما اعتقد، "كل الناس بتدخل الجيش"، "مفيش مفر يا ابني"، "في ناس عندهم بلاوي اكتر منك ودخلوا".
وأثناء كل تلك الجدالات، اجد منظرًا مألوفًا، إنه قسم الهرم، صوت يهمس لعقلي "احيه ده انا نازل هنا"، ثم صحت قائلًا  "علي جمب يسطي"، يبدو من نظراتهم أن صوتي كان عاليًا قليلًا، فالحقيقة انا لا اكترث "ما انا اللي همشي في الاخر".
الساعة التاسعة والخمس دقائق، ولكني اشعر بالسعاده لعدم وجود ازدحام في الطريق إلي مكتب التجنيد، "صباح الخير" بابتسامه خفيفه صحت بها منبهًا مندوب التجنيد لوجودي، "اؤمر" واقترب الشاب الاسمر فظهرت ملامحه، يبدو عليه الإرهاق وكأنه يعمل منذ اعوام دون توقف، ورغم رده القاسي فاستطعت أن احتفظ بابتسامتي.
+ كنت عايز اعرف هو انا لو..
= تعالي يوم 20/10
+ يامعلم اسمع بس للاخر اصل..
= يوم 20/10 مش برد علي اسئله
+ يا دفعه، اصلي مش مولود في الجيزة
= مش مهم مولود فين، اول بطاقه عملتها تبع حاجه في الجيزة؟
+ ايوه اكتوبر
= خلاص يبقي تيجي يوم 20/10
+ طب انا معاد تقديمي فات، انا اصلًا مواليد شهر يناير بس الشهاده اتأخرت
= 20/10 يا برنس انا رديت علي سؤالك
غادرت المكان، ساخطًا علي ذلك الشاب، أري العديد من علامات الاستفهام حولي، هل سأكون من المتقدمين مع دفعة هذا الشهر؟ أم سيكون علي الانتظار لدفعة شهر يناير؟ أين سيكون مكان خدمتي؟، "ياتري هقضي مركز التدريب فين"، "ولا لسه شهر يناير زي ما صحابك قالولك؟"، "هتدخل الجيش بالربو"، "مش هتعرف تاخد اعفاء"، "ظابط 3 سنين وشهر ونص تأخير"، "هتموت جوه بأزمة ربو من اللي بيجولك مش هيلحقوك"، "كله بيدخل الجيش".
وأخيرًا استطعت أن اسيطر علي الاصوات، انها العاشرة والنصف، سأخلد للنوم مره ثانيه علي أمل أن أكمل ذلك الحلم المبهج.
...

السبت، 24 ديسمبر، 2016

2017

كل نهاية عام بتحصل عادة عندي إني أحاول يبقى عندي قرارات أنفذها في العام الجديد ، بس الحقيقة عمر ما المخطط ده نجح و، و أكيد مش هينجح المرة دي ..
لكن عندي شوية أخبار و إنجازات صغيرة :

- اعتقد اني حققت تغيير شخصيتي الحقيقية و الفيسبوكية اللي كنت بأطمح له ، فده إنجاز كويس يستحق تشجيعة او ان حد يعزمني على حاجة او اكلة .
- يوم 31 ديسمبر هاستلم العفش فهقضي رأس السنة في عمالة و توزيع و ليلة ماتتلم .
- هتنتهي سنة 2016 بكل ذكرياتها المتعلقة بالتجنيد و ما إليه ، رغم إن بعض من هناك وحشوني و بيمروا بظروف صعبة .


هأضيف اي انجاز افتكره ، فالموضوع ده قابل للتعديل عشان مخي لا يعتمد عليه ..

الخميس، 22 ديسمبر، 2016

بيان و توضيح للاصدقاء و المتابعين

اولا : انا مش بأعمل حاجة عشان الشهرة و اللايكات ، عايز تتابع وتشوف معلومات معايا اهلا و سهلا انا مش بمن عليك بعلمي انا مجرد واحد عرف حاجة و بيشاركها معاك .

ثانيا : بالنسبة للسخرية ، هي في دمي ، فكل ماهو موجود قابل للسخرية ، والمكان الامن الوحيد هو سرك .

ثالثا: اه ، عندي مشكلة مع نسخة الاسلام المتداولة اللي بيعتنقها 99% من التعداد الرسمي ، النسخة دي عدائية و غير متعايشة و همجية و عنصرية و عندها بارانويا و فوق كل ده عندها متلازمة الشعور بالاضطهاد ، مش مشكلتي هتصلحها ازاي  ولكن انا قررت حالا اني لن اقبل في حياتي لا الواقعية ولا الافتراضية اي معتنق لهذة النسخة و دي مش عنصرية ده حقي الكامل .

رابعا : حبك لوطنك شيء و ركوعك و تسبيحك بسم النظام الحاكم شيء تاني ، ينطبق عليك قانون انت حر مالم تضر .

خامسا : كل من هو على الاكونت فهو على راسي من فوق سواء صديق او متابع ، اضمن حقك في التعبير بحرية و عدم التعرض من صاحب الاكونت او من طرف ثالث ، في حال تطاولت على صاحب الاكونت او اي معلق عنده هاديك فرصة واحدة و التانية هالغي صداقتك و التالتة بلوك.

بكامل الاحترام اهلا بالجميع

الأحد، 18 ديسمبر، 2016

الأحد 18 ديسمبر 2016

من حق أي حد يبقيني في حياته أو يخرجني منها، أنا مش بأتمسك بحد ، مش عشان أنا الجامد جدا ولا عشان ماليش غالي وكده ، بس بببساطة عشان عندي مشكلة فيما يخص العلاقات الإجتماعية ، أنا مش بأعرف أحتفظ بيها أو أستمر فيها ، الناس مش بتستحمل تصرفاتي أو طريقتي أو أيًا يكن ما يصدر مني ، هو حاجة بأشير ليها دائما بإني "ماعنديش صحاب" أو "مش بحب أصاحب" ، هو عدم القدرة المتسبب في فقدان الرغبة .

في ناس مش عارف فعلا ليه مسحوني من على الفيس بوك ، هأعترف إن ماكانتش بتربط بيني و بينهم علاقة شخصية و طيدة و أغلبهم ماشفتهوش على الواقع ، لكن نوع الرابط بيننا على الأقل هو علاقة هز الرأس، ودي علاقة في حد ذاتها مافيهاش متطلبات كتير تكون متوقعها مني ، و في نفس الوقت بتحافظ على الأوضاع في حيّز الود المقبول .

ما أظنش إني مسحت حد ، غير لو الموضوع وصل بيه إنه يشتمني بشكل شاذ أو مستعرض ، حتى الشتيمة العادية مش بأمسح حد عليها ، لكن دايما ناس بأتوقع مايمسحونيش لإن مافيش داعي أصلا لحاجة زي كده ، غالبا الناس دي بتاعة "خليك قلبك مفتوح لغيرك" " و اتعلم تتعامل مع الناس" ، مش عايز أتعلم، لإن في الغالب اخر رسالة منهم ليك بتكون "انت شخص كويس وانا باحترمك زي أخويا" إلخ ، و في النهاية بتلاقي إنك مش عارف ترد على الرسالة لإنك معمول لك بلوك!!! .

ماتزعلش مني لو انت بتعتبر نفسك صديقي وانا بأقول لك "ماليش صحاب" بس حط نفسك في ظروفي ، خلي حياتك وقت الطفولة مجموعة تنقلات دائمة ماتسمحش إنك تربي علاقة مستمرة لاكتر من كام شهر ، وشوف هتعمل إيه ؟! . 

الأحد، 11 ديسمبر، 2016

القاهرة - 11 ديسمبر 2016

حاجة تضايق جدا إن حد من أهلك يكون شايفك بعين إنك ساذج لدرجة انه خايف ان اهل مراتك يضحكوا عليك ،و بيأمرني كمان كإني عيل صغير إني ما أمضيش على أي حاجة إلا بمعرفته ، بجد أنا مستعد امضي على اقرار بروحي للشيطان و امشي من هنا حالا ...

امي النهاردة بعد مشوار طويل اخدته انا و دعاء للتبضع لاغراض شقتنا ، جابت لي هدية شنطة للشغل ، عجبتني جدا انيقة ، شكرتها عليها .

الثلاثاء، 6 ديسمبر، 2016

الثلاثاء 6 ديسمبر 2016

إجراءات تجهيز شقتي على قدم وساق بس أنا فعليا زهقت و تعبت ، محتاج أجازة أرتاح فيها و أشوف نفسي ، لكن وقت فراغي موزع حاليا بين الستارة و السجادة و النجفة و دكتور السنان .

وحتى والدي لما خلصت من ورق الشغل اللي هأستلمه من القسم و قلت لنفسي "مش هيلاقي حاجة تانية يصحيني عشانها بدري" لقيته بيصحيني حاليا يوميا عشان أشوف الدهان ، و أرائي، ياحاج انا قلت حاجة و خلاص مش هأغيرها.

مؤخرا بقيت مصدر للمعلومات العجيبة على الفيس بوك لكن عليا الاعتراف ان ده افضل و بعيد عن الخوض في الغباء البشري السياسي و الديني و ما إلى ذلك، الصراعات مش محتاجها حاليا ، لحد ما استقر في شقتي أخيرا .