آداب الكلام في التلفون (متجدد)

من كلامي مع المصريين، و اللي هم اسخف شعب على التلفون تقريبا بعد الانجليز ، لاحظت شوية ظواهر كده لازم تتعدل عشان تكون مكالمات بتحقق الكفاءة المطلوبة (اعلى فايدة في اقل وقت ممكن) ، حيث أني مش من هواة الرغي عديم الهدف كتير أو كثير العلاقات الإجتماعية .
حاولت في التدوينة دي أجمعهم و لو بشكل عشوائي و متجدد على شكل نقط ، على أمل إن يوما ما نعملهم كتاب إجباري في المرحلة الإبتدائية :

- لو بتكلّم شخص لأوّل مرة، شخص ماكلمتوش من فترة من المتوقع إنه فقد نمرتك في خضم مشاغل الحياة ، خصوصا لو صاحب حرفة أو صاحب المصلحة ، دايما و أبدا بتعرّف نفسك بالإسم و جهة العمل أو المعمول ، و بتسأل لو الوقت مناسب و بتطلب غرضك من المكالمة بذوق و إحترام متبادل من غير نص ساعة سلامات و سؤال على الصحة و الأولاد و البيبي بتاع المدام و إزاي نقعّد 4على كرسي واحد من غير مانقلبه إلخ هذا الهراء.

- إنت مش الرائد محمد من أمن الدولة ، ولا عويس من عندنا في البلد ولقيت مساخيط ، انا ماليش بلد اصلا عشان تعمل نفسك أنديانا جونز و تلاقي مساخيط، مساخيط إيه يا سبعيناتي يارخيص يا مبتذل !؟ .

- مش لازم تعزم حد على فرح على التلفون و تتصل بالمعازيم معزوم معزوم ، إحنا في 2017 إعمل إيفينت على الفيس بوك ، و إنت يا معزوم مش لازم تستنى المرسال الملكي على الترانك ، تخطى الايجو المنتفخ بتاعك و بطّل جليطة ، هي الأفراح أصلا شيء مزعج و ممل ، مش لازم كمان نكدّر الناس و هي بتتعزم عليه.

- موظّف خدمة العملاء اللي بتكلمه على التلفون إبن ناس ، مش جارية عندك ، حتى لو عندك شكوى اطلب تتحل بإحترام ، هو مش قاعد في مكيف و بيهوي على فخاده مستني سيادتك ، غالبا هو في وسط معمعة و إنت مجرد رقم من 100 رقم بيدخلوا له في اليوم ، بيتحاسب على حاجات كتير من ضمنها وقت المكالمة ، إتكلم ببشاشة و ناديه بإسمه كده خليه يخدمك بنفس.

- برضه موظف خدمة العملاء حاول تقدّر الناس ، اعمل شغلك على احسن ما يكون ، العملاء مش غوغاء بهائم انت رب عليهم (على الاقل مش كلهم كده) .

تعليقات

إرسال تعليق

المشاركات الشائعة من هذه المدونة

قواعد اللاإكتراثية الأربعون

تعذيب : 3 - كرسي التغطيس

تعذيب : 1- أحذية العقاب